صوت الصورة

لا بأس من بعض الهوايات لا بأس
إن كان ما فيها خطر أو جنايه
بس الملاحظ في كثيرٍ من الناس
ما يأخذون من الإصابه حمايه
أشياء بسيطه مثل خوذه على الرأس
واخذ الحذر من قبل بدء الهوايه
يا مغامرين بلعبةٍ ما لها ساس
أخاف تحت الشاص تأتي النهايه
ناصر جمعان آل عوض - وادي الدواسر
حذرا التهوّر واللعب بالمواتر
حافظ على نفسك عيون ترجيك
أخبارها حزنٍ يجينا متواتر
ترى التهوّر لحظةٍ ثم ينهيك
وأبعد عن التفحيط حط السواتر
وأحفظ حلالك كان تبغاه يغنيك
عبدالله الحامد الشريف - الدرعية
جيب الربع يمشي على جنب مرفوع
يمشي على ثنتين واثنين مفكوك
كم واحدٍ متهورٍ مات مصروع
حسبي على اللي شجعوكم وحدوك
عبدالمحسن محمد المحيسن - رياض الخبراء
شباب فاضي يحط الجيب لعبوبه
واحد يسوقه والآخر فك له تاير
عشنا وشفنا من الاغلاط معيوبه
يشيب راسك وعقلك واقفٍ حاير
يا ريحة الموت لا تمشين بدروبه
الروح ما ترخص إلا على الجاير
حمد عبدالله الوايلي - حوطة سدير
ثلاثة من الشبان ركبوا على الجيب
واحد يسوق واثنين فكوا الكفرات
من فعلهم يا ناس شفت التعاجيب
يعجز لسانك لا يقول العبارات
بعض التهوّر عذّب الحال تعذيب
على السرير يزعج من الصوت ونّات
خالد بن ناصر المخيمر - روضة سدير
نفسك عزيزة حذاري اليوم تهلكها
وما كل مرّة سلامة لا يغرونك
حذرى المخاطر وفكر في عواقبها
خلفك نفوسٍ تحرّى هم يحبونك
هذي سلومٍ نقول اليوم جنّبها
محلى السلامة وفكر قبل ينعونك
محمد عبدالعزيز الخنيفر - أشيقر
العرض لو أمتع كبيراتٍ أخطاره
مشهد مُثيراً .. وسايقه برّا
فوق الكفر يسراه ويمناه بالطاره
لو كان ما هو محترف ما تجرّا
وش ينفعه عرضه وكل الجساره
إليا حدث له حادثٍ ما يسرّا
سعود عائيش الحربي - القاهرة
على الربع يمشي على الجنب ماخاف
فك الكفر رجله على جنط ذا الجيب
صحيح شاطر لكن الموت ينشاف
معك تهوّر ولا عرفت العواقيب
سعود عبدالعزيز الهزاع - نعام
هذا التهوّر فيه أخطار .. وأخطار
ليه التحدي ؟ ذا العمل فعل مجنون!
وش فايدة تصوير .. أو لفت الأنظار
في لحظةٍ يعجز تحكّم دركسون
وتتناثرون يمين يا ناس ويسار
هذا خطر .. أيضا مصيبة تموتون
بشائر القحطاني - الرياض
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 4871070
ونرحب بما تلتقطه عدساكم من الصور
الطريفة والهادفة .. وياهلا
صورة العدد السابق