يوم الوطن اثنين وثمانين

أعوذ بالله من حضور الشياطين
أعوذ به من حضرته وخطواته
وبسم الله ابدأ في كلامي عن الزين
ومن يذكر اسمه ثبته في ثباته
قال الشلاقي بالوطن يوفي الدين
وكل شاعراً مثله يسوي سواته
الله ومحمد والوطن داخل العين
ولأحدن يقرب رملته وحصواته
وطنا بالخط الحمر بين قوسين
وحنا وقعّنا بالحمر مع ولاته
يوم البلاد بقوت الله قويين
يوم البلاد الوطني يا حلاته
يوم الوطن والرقم اثنين وثمانين
يوم الوطن في وحدته من شتاته
أحلى وطن موجود حاضر وبعدين
وآدم وحواء حولو في صفاته
ونبينا الهادي هدانا على الدين
عليه منا والله أفضل صلاته
وأصحابه الأخيار عنده وغالين
بجنبه مقر قبوهم من غلاته
وجدودنا فيها قديماً وتالين
كل واحداً فيها شهادة وفاته
أرض النبوة والهدى والحرمين
كن مسلماً يمه يوجه صلاته
هذا وطنا فيه حيين ميتين
ومن مات منا فيه يدفن رفاته
وبالعز عبدالله وجيشه عزيزين
وأنا أشهد أنه ضفنا في عباته
وأنا أشهد أنه يالرجال الفهيمين
حبه لشعبه ميزتاً من سماته
أعلن وصاته بالوطن هو ويا الدين
والشعب كله حافضيناً وصاته
وكل السعود الطيبين الشريفين
الله يثبت دولة هم حماته
عاشت حكومتنا علينا حريصين
العلم هيئ للولد مع خواته
والعلم مطلوبن ولو كان بالصين
قال نبيك ونشروها ثقاته
وحنا نجيد العلم وسط الميادين
وعلى الركايب حارسيناً فلاته
وبالعولمة ماشين فيها سريعين
ولحقنا قومن له سنيناً وفاته
ومدام حنا والشريعة وماضين
ما هزنا قول الردى والشماته
حمود بن عايد الشلاقي - حائل