شتات قلب

احترق قلبي وفالريح ذريته شتات
بس باقي عينٍ اشوفها تبكي عليك
جادت الماء كن حبك على خدي نبات
الله انه يسقي الوصل والأيام ذيك
يا وحيد المبتلى راحت الدنيا وجات
وانت غايب عن عيوني وفي عقلي شريك
حاملٍ لك خاطري عاطفه مع طهر ذات
لو تجيني قلت عندك وانا لو رحت ابيك
الغلاء العذري مثل فطرتك له معطيات
غارقٍ في بحر حبك ومن وصلك دريك
والتحرّك في حياتي على شانك ثبات
ان مشيت ادوّرك وان توقّفت احتريك
يا جريح اليوم من تعرفه قبل امس فات
قفّت اقدامه ولا تلحقه مدّة يديك
واعظم العشاق من خلّد احبابه ومات
وانت خلّك ما بعد مات لكنه وشيك
والفناء في عالمك من جميل الامنيات
رابحٍ من ضاع عمره وبعده يلتقيك
قوم فاخر بعد موتي على كل البنات
من هي اللي قيل فيها؟ مثل ما قلت فيك
والله انك تجذب الروح من كل الجهات
كل ذرّه من كياني تزورك قبل اجيك