صوت الصورة

الموتر اللي ماليٍ حوضه مياه
لاهوب لا ددسن ولا هوب وايت
وراعيه وسط الحوض سباح شفناه
أكيد فيه الصيف راكل وشايت
سعود سعد الحافي – الرياض
من له حيله فهو يحتال
سواق يسبح على الدنّا
الجو يغلي وصبره طال
معذور رد الخبر عنّا
خليف الحربي - الرياض
وين أنت ياللي تبي تسبح ؟
أسرع ترى الوقت ما يسعفك
امسك سرى عند هالمسبح
واحذر من الما لا يغرقك
عبدالكريم النغيمشي - الربيعية
‏
الحر كايد والمسابح قليله
والاستراحه غاليه ما معي كاش
قلت أخترع مسبح بفكره جميله
قدام بيتي أشبه بغرفة إنعاش
خالد بن ناصر المخيمر – روضة سدير
يا مرهّم الدباب نادي سباحه
متمدد بحوضه تقل فحل تمساح
الماء يشرى عذب لو به ملاحه
وباين عليك من الفواتير مرتاح
عبدالكريم الراشد التميمي – الغزالة
لهيب القيظ حاديه وسمومه
عسى تخف الحراره بالسباحه
يدوّر راحته ويعيش يومه
بعد التعب هذي الراحه
عبدالله عبود السهلي - تبوك
حوض دبابه غدا بركة سباحه
ويمكن انه يا خذ برات اختراع
عنده الما منقطع باستراحه
وصار يسبح بالفضا بالشراع
ودّه يجرّب نصيبه بالسياحه
ويعمل المطلوب قدر المستطاع
عقلا خزن – تبوك
مملكتنا وفي جوها الحار
ما ينفعك يا كود موتر غماره
تحط به مسبح وماه ما نار
وتكب به أهل الرداء والقشاره
ماضي بن زيد القضاعي - الشعراء
يا سابحٍ بالما ترى الحوض طربال
ملبّسٍ في حوض موتر جديدي
صحيح هالفكره تجي صعب بالبال
لكن بالترتيب كلش مفيدي
عبدالله علي الحوشاني – الرياض
بحوض الدينا فارش شراع طوله
ثمانيه والعرض يأتي له أمتار
وعباه واستانس وهذي رجوله
مرتفعةٍ بالما ومن شانها كبار
سعود بن عبدالعزيز الهزاع - نعام
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة
صورة العدد السابق