أبرر له الأعذار

الى غايبٍ دونه محيط اطلسي وبحور
يغيب ويعود وغيبته شفتها طالت
غيابٍ كتبت بدايته من شهر عاشور
والأفكار من غيبتك كم حطت وشالت
منول ليا طالت شهر ماتطول شهور
ولو كان حتى يوم من خافقي نالت
ابشرك بعلوم الحيا والوطن ممطور
والأرض ارتوت والاوديه كلها سالت
جميع الديار الممحله والاراضي البور
نبت عشبها واشجارها اغصانها مالت
جنانٍ خلقها الله ولاحط فيها حور
تشدك مناظرها والامطار لا زالت
ولا باقياً مأرجع سوى الخافق المدهور
عليه الوقوت بسبة غيابك انهالت
يقولون يمكن صايرٍ في الامور امور
وانا مااستمع في هرجة الناس لو قالت
ابررله الاعذار واقول له معذور
واقول الظروف اللي على عودته حالت
زيد بن راجح البقمي