ذكر الحيا

ان كان تبغوني على طول ماضيق
وانسى هموم بالضماير تروعي
خلوني اشم الهواء بالصعافيق
واسج رجلي مع نبات الفروعي
يا ما حلا ن الهواء للزماليق
برض خلا مابه من الناس دوعي
قفر نباته ما وطيبه ولاذيق
الا الطيور مغردات اسجوعي
هذاك كيفي واسمعوا يامخاليق
شوف الفياض المخضرة هو متوعي
برض بها تلقا الزبيدي مفاتيق
بالقاع تأثيره سوات الصدوعي
لاصرت طلق الراس ضمن المطاليق
شم النسيم الطلق للروح يوعي
مع جملة عيال نشاما مشافيق
للمرجلة والطيب دايم تتوعي
الكل منهم ذرب مافيه تبريق
ما هو من الفرجة ملول وجزوعي
هذي مناتي والسعد والتوافيق
بيدين من خلقه على كل نوعي
لاشك اسلي خاطري بالطواريق
وحب الطبيعة من ركايز طبوعي
انا بدوي والله ما ارتاح وافيق
الا على ذكر الحيا والرجوعي
اليا بدا وقت الحيا زدت تشويق
خطر من الفرحة تذارف دموعي
من لامني ما يعرف العلم ويطيق
قليل ميز ولا يعرف السنوعي
ماله نصيب بشوف ذيك المغاديق
خضر الفياض اللي سوات الزروعي
وغدران تسمع له صليل وتصفيق
وسط الملازم يطربن السموعي
هذا الخبر والعلم صادر بتصديق
شهادته من روس كل الجموعي
يالله يا فاتح ابواب مغاليق
يا عالم في غيب صم الضلوعي
تسقي وطنا من مزون مساويق
لما غزير الماء قلب كل قوعي
وختامها صلوا صلاة بتوثيق
على النبي صلوا صلاة الخشوعي
خلف بن غالب بن مريخان الحربي