راح الحبيب

راح الحبيب وعافت النوم عيني
واصبحت من بعده سهير لحالي
يالله على فرقا الحبايب تعيني
البعد صعب وتارك الدار غالي
القلب من بعده كئيب حزيني
يارب ترحم بعد فرقاه حالي
ناديت بأعلى صوت وينه ضنيني؟
كن البلد بعده من الناس خالي
العام جنبي كل ساعة يجيني
واليوم خلاني على ضيق بالي
لاشك أنا صابر وعندي يقيني
مؤمن بتصريف القدر والليالي
فرقاه صعبة والشقا يكتويني
وانا مقدر ظرفه اللي شكالي
راضي بحكم الله ولا في يديني
غير ادعو الخالق والح بسؤالي
يا تاج راسي ياليالي سنيني
مافيه غيرك ساكن في خيالي
انا بدونك عيشتي ما تزيني
لعل بعد المر نذوق حالي
نصبر ونخفي فالفؤاد الحيني
لا بد ما الغالي يعود لغالي