الصيف ربط الطير

سلام مني والتحية من الذات
على الذي يمشون ممشى الجماله
حطوا لهم بالمجد والجود رايات
وصف الفتى فيهم يحب الجزاله
أصحاب والأصحاب ياجب لهم نات
ومشاغل الأيام دون الوصاله
أهل البيوت النازيات الرفيعات
أهل الكرم والطيب لاجا مجاله
الكل منهم شرع الباب طولات
نجره يلالي والمباهر عداله
ياطارشي خذلي معك جملة أبيات
اسلم وسلم واستلم لي رساله
خبري بهم شعار بالحكم والزات
وهات الردود اللي عليهم سهاله
قل الجريش ارسل لكم جملة ابيات
هاك الحرار اللي تنومس فعاله
الصيف ربط الطير والوسم طلعات
الشخص منهم لاقنص له دلاله
بالقيظ يذكر راعي الطير طربات
قلبه معلق بين طيره وحاله
وإذا السويبع بان وسهيل سجات
يا حلوها يا حلها يا حلاله
معلوق قلبي منقطع والعلامات
هنه يخلن عاقل في هباله
قلبي تعلق بالحرار الصريمات
ولا عيوني هن حاله وماله
من خلقتي والطير للنفس مشهات
وانا مولع والولع به جهاله
خالد سليمان إبراهيم الجريش