المناخ المداري

الكون تسبح فيه كمّ من مجرّه
وحنّا بوحده وضعنا باختصاري
الشمس مركز للكواكب تمرّه
مع انها تجري مع كل جاري
والارض حول الشمس واتدور مرّه
تاخذ سنه والها قمرها مباري
وفي اليوم تاخذ حولها بس فرّه
وينتج لنا الليل بعد النهاري
ياليل .. مسحوبي بصوتي أجرّه
وقتي.. رماني بالمناخ المداري
ياكثر عج ن به .. وياكثر حرّه
من قبل يعرف الاحتباس الحراري
ما فيه لمزون المراويح.. جرّه
مناخنا بالفعل ..جاف ن.. و قاري
لو خيروني بين برّه وبحره
من بينها لا شك ضاع اختياري
والناس صارت بين بحره وبرّه
متأثره بكلّ ما هو حضاري
واوضاعنا ما عادها بمستقرّه
الناس غير الناس والكل داري
حياتنا من فقد الاحلام مرّه
تغيب شمس وتستمر الغداري
حياتنا فيها امور ن مضرّه
تستدعي العاقل يردد.. حذاري
لا بد للانسان كره وفرّه
مره على كيفه ومره يجاري
او يرقب المقسوم خيره و شرّه
وما قدر المولى على العبد جاري
ناصر بن هذال آل شري