الله يديمك يانديم الحق

امطرت من فضلك على شعبك بخيرك يالغزير
شف الوفاء والحب زاهر بالوجيه وبالصدور
ياسيدي من وقفتك ماعاد به امرٍ عسير
يسرتها من كل صوب إلين سهلت الأمور
سليت سيف العز يالمطنوخ من غمد الجفير
في صدر شعبك قمت واحييت التفائل والسرور
واللهِ ياخيرك يابو متعب على العالم كثير
عطيت وارهيت وبذلت وماحصل منك قصور
دوك الحشود المقبلة بالحب والجمع الغفير
وشلون تهديك الولاء من قلب واحساس وشعور
ياسيدي,ياتاج راس العز يالشهم يالكبير
خذنا لعينك ماتبي قلب ٍ على أرضه غيور
خذنا يد ٍ وحدة جميع الشعب باليوم الخطير
عهد ووعد عزم وجلد ولا أحد منا يبور
حنا ترا بامرك يابو متعب على العايل نغير
من دون حد الدين وحدود الوطن غيرة نثور
خذنا بوجه اهل الفتن موت وشر ٍ مستطير
ماعندنا الا السحق للي خان ويلف ويدور
حنا حديد ٍ في يدك مهما يصير اللي يصير
أضرب بنا وابطش بنا واطعن بنا بطن ونحور
درع الوطن حنا وحنا سيف من دونه شطير
اقطع بنا روس الفتن وابتر بنا يد الشرور
وشلون مانفديك وانت لحفظنا دايم سهير
لأرضنا ولعرضنا ولعزنا حصن ٍ وسور
الله يديمك يانديم الحق يالشهم الكبير
تبقى لنا ياسيدي دايم بوجه الليل نور
فيصل بن سبيّل الباهلي