خط الخيانة

روحي مع اللي بالخفايا تحبيه
واخذي معاه من الهوى ما بدالك
دام انكشف سرك وبانت مواريه
خلك على خط الخيانه لحالك
امر انكشف ما عاد يمديك تخفيه
بانت رسوم السالفه من حوالك
عندي يقين انك تحبه وتغليه
واكبر دليل اليا سر حبك خيالك
للماضي اللي جيت بشويش تحييه
ودك تعود ايام عهد مضالك
لو هو بكيفك كان واقعك تلغيه
لكن ظروف الوقت شلت وصالك
هذي امانيك القديمة وامانيه
مير الزمن في حينها ما صفالك
خل الحقايق خافي النفس تبديه
وانشر اثر حبه بصادق سؤالك
دامك وفي الوفا ما تخليه
كب الجميع لخاطره وانطرالك
وانا بعد ما عاد لي شي ارجيه
ماله لزوم تعيش عيني قبالك
والقلب ما خارت رواسي عواليه
ولاهزني شوف العيون لجمالك
خذ عهد من شخص الوفا من مباديه
ما بوح للعذال سبت خمالك