صيف العشرة

جيت مثل المزون اللي تغشت سماي
ورحت مثل اللهيب اللي صلاني صلي
كيف صرت الهنا اللي صار.. تالي عناي
وكيف صرت السواد اللي قبل.. مخملي
مدري طعت اللي يسعى في شقاك وشقاي
أوغدت بك أحاسيس الخفوق الخلي
تحسب إني إلى اقفيت.. أبا ناظر وراي
وارجي خيال.. صيف العشره.. الممحلي
لوغدا حر بعدك لاهبٍ في حشاي
وامتلأ قلبي من هموم فقدك ملي
ما طلبت الرجوع ولو تزايد أساي
ولا رضخت لشروط المقفي المبتلي
أنت مخطي.. وانا مانيب منكر خطاي
حسبي الله عليك.. وحسبك الله علي