الغربة الغبرا

البعد والونة اللي زفها صوت (ناي)!
والحزن والكبت والفرقا بدت حربها
تشن غاراتها .. وانا التوجد عزاي
وخذتني الغربة الغبرا على دربها
(يومين) غابت قبل مدة .. وعكر سماي
وغنيت (للأربعا والسبت) .. من كربها
وجت عقب (سبتين والثالث)! بحثلي خفاي
وطلت بشمس (العذر) لين ابتسم غربها
واليوم! راحت وعود لي شقاي وعناي
وطيور الآهات! داهم خافقي سربها
عن حالتي! جاوبت نظرة عيون اخوياي
وهاذا من أسباب فرقاها ومن ضربها
اناجي الليل وارسل مع نسيمه نداي
لعل ليل الرجا يمي يسافربها
ذبحني البرد وانتي مبعده يادفاي
ياجمرة ينمو الاحساس مع قربها
اضمها في حشاي .. ولا تكدر حشاي
والقلب! ماتحرقه .. لكني اشعربها
اشعربها بلسم كله دواي وشفاي
ورد تنامى بدنياي وتناثربها
شعور ينعش معاليقي ويروي ضماي
وكل الشرايين في صدري! تباشربها
واحساس يبهج صباحاتي ويضوي مساي
تكبر به آمال خفاقي ويكبربها
(مدعاه للكبت..فرقاها وونة وناي)
وكلي خذتني من اقصايه على دربها
عبد الرزاق الذيابي