عشق الحرف

حالة قلق تنتابني حين مولدك
هاجس يسمونه مخاض القصيده
وأعيش في لحظة ترقب لموعدك
ناطر بكل الشوق فكره جديده
قصيدتي باسم المبادي أناشدك
تكفين لا تبقين عني بعيده
أنسى همومي في حضورك وارددك
وأكرر القافي مرارٍ واعيده
ما ودي أسأل عنْك فكري ولا اجدك
بوجودك أتخطى الظروف العنيده
ودي الي مني كتبتك أخلّدك
وانشرك للجمهور عبر الجريده
ما فيه حد يقدر يصدك ويبعدك
عني، خذي مني العلوم الأكيده
أقولها وأنا بحرفي معاهدك
ما أكتبك في غير جمله مفيده
قصيدتي في بعض الاحيان انا احسدك
لمّّا أعبّّر فيك عمّا أريده
لكن بعشق الحرف لا يمكن أجحدك
شاعرك غير الشعر وش هو رصيده
مبروك بن ماضي