مبعدات الفجوج

يازين ياهل المعرفه مبعدات الفجوج
ياطيب بعض الحياه وطيب تغريبها
لياصار صاحبك ومصاحبك لجل الهروج
احسن تسولف على روحك بتأديبها
الصمت حكمه ولكن من يحفظ الدروج
ياكثر من يبحث الاسرار ويجيبها
كنه مكلف على تفسير بعض البروج
النجمه اللي تغيب اليوم يدري بها
والنقص يكمل ويذكر من سمات العلوج
اللي تسد النواقص في هذاريبها
بعض البشر ياهل الوقفات مثل الخروج
اللي تشيل الحيايا في هناديبها
يشيل فوج من القالات ويرد فوج
ياكثر ما ينقل الهزله ويبدي بها
على مزاجه يسّيرها بدرب معيوج
ياخذ طواريف هرجتنا ويسري بها
من مثلهم ياعساهم في طمان الهبوج
تدفن عليهم وناطاها ونمشي بها
وإلا هل الطيب مثل الطيب ريحه يفوج
ياالله تزين لمن طابوا مشاريبها
عبدالله الهقاش