خيره

كل شي إيمرني فالعمر أعدّه خيره
دامني ما كل شيٍ فالحياه أختاره
أرجي الله كل ما أصبح فضله وتيسيره
وآتذرا في حروزه وأحتمي بأذكاره
وكل ما جاني من صروف الزمان مغيره
أحتمي بالله .. ولطف الله يرد الغاره
ما أكتويت ومن فضل ربي ماعرف الطيره
ولا آتشاءم لا بدالي من صباح غباره
ما خذيت العمر سجه ماخذه في حيره
حاسبٍ لأيام ما يلقى القدم معباره
شفت ما عاق الفؤاد وما حبس تعبيره
وما سرح بالعقل وآنحى به وزاد أفكاره
ما ظهر لي ليتني ما قلت ابي تفسيره
وما خفاني ليتني ما قلت ابي إظهاره
لو نقول الوقت داير، وش سبب تدويره
ليش قلنا طاب تاره ثم تردى تاره
ماضي الأزمان سيره حيّها من سيره
وتالي الأزمان كنه ناقصٍ مقداره
إنشد الجيران عن باقي علوم الجيره
وش بقى منها وكلن ما يطال جداره
وانشد الأقراب عن تالي علوم الديره
واحد من الألف يبهجك ذكر أخباره
وانشد الرجال عن سرٍ دفن في بيره
الأخو ينسى أخوه من البطا ما زاره
وانشد الرجال عن نفسه وجنّب غيره
كم راعي دار ما يدري بحالة داره
آه من وقتٍ علينا بيّن التكشيره
وآه منّا كيف ضيعنا وسط تياره
عايشين العمر .. نحسب عمرنا تصبيره
وكسرنا مدري متى فينا يبين إجباره
للأسف ما عاد عندي غير قولة: خيره
دامني ما كل شيٍ فالحياه أختاره