صوت الصورة

هذا مشبب للمهمات نطاح
ما هو يقلد بعض ناسٍ مشافيح
يلعب مع الحيران.. والبال مرتاح
حب الحوار وكل دربه سواميح
علي رشيد الرشيد - رياض الخبراء
أشوف لي فالمسيل حوار
وراعيه مبسوط ويحبّه
بعد المطر تنبت الأشجار
والعشب تلقاه من غبّه
غازي بن قاعد العتيبي - الدوادمي
لبوك وامك خلها حبة الراس
واللي يشم أنفاس مرضان يعديه
هذا الحويّر ضاق مِن زحْمة الناس
فكه مع إمّه بالخلا كان تغليه
فهد بن عقيل الطويان .. بريدة
راع الحوير ياعرب باح سدّه
من كثر ماهو يحبه دوم يغليه
هذا حنانٍ يا عرب زاد حدّه
ولاحدٍ يلومه بس متمسك فيه
خليف الحربي - الرياض
قرّب تعال وعطني اليوم بوسه
بوسة وله من عاشقٍ هايم فيك
يا صاحبي ليلي ترى صار حوسه
أقوم من نومي وأصايح واناديك
عبدالكريم النغيمشي - الربيعية
راعي الحلال يحب طاري حلاله
ويحب حتى حوارها من غلاها
وبالوصف تعادل واحدٍ من عياله
ولفه عجيبه بينها وبين أهلها
حمد عبدالله الوايلي - حوطة سدير
هذا الحنان يا ناس والا بلاشي
شوفوا أحويشي على صاحبه حن
والله ما بيعة لو عطوني ألف حاشي
ولو يدفعون من الذهب خمسة عشر طن
صالح عبدالرحمن الماضي _ عنيزة
يا مقبّل احوير صغيراً على الفم
فعلك مودّه به حنان و ذا زين
واللي اخذ صوره لكم صار مهتم
ودّه نشوف الصوره لكل الاثنين
محمد صالح الاطرش - رياض الخبراء
الغلا باين من حبتك للقعود
من يلومك وحب البل ساسٍ لنا
حبها وارثينه من عصر الجدود
شوفها راحةٍ للنفس من بعد العنا
عبدالمحسن محمد الجريسي - الرياض
البل راحوا أهلها وصارت حبيسة اشبوك
وشفها ارضٍ مساس ومن الوسم ممطوره
واليوم في زربة عليها الباب مصكوك
ومن زارها ياخذ مع حيرانها صوره
محمد سعد الجروي – الرياض
صورة العدد الماضي
يا لايمي في حبه الله يسامحك
ما تدري إن الولف راعيه مسموح
يا ما حلا اقباله إلى جاك ناطحك
كنه يهلي بك من الروح للروح
فهد بن علي الحبيب - البكيرية
الحوير غالي ووزنه ذهب
وانتبه له وأحفظه لا جا مجاله
والحذر لا تهمله تلقى العتب
عن دروب الناس وافهم هالرساله
محمد بن عبدالعزيز الخنيفر - أشيقر
البل الله ذكرها وحبها له مواري
شف مواري المحبه عايمٍ في رقبتها
ماحدٍ لايمه في حب سفن الصحاري
ذي مواريث والعربان ما هملتها
مبارك بن محمد الدوسري
القلب يمك يا صغير الحيران
رزقي ورزقك ما هوب عند افلاني
ربي يجيب العشب والغدران
ترعى النفل والروض بالصماني
عبدالكريم عبدالرحمن السلوم - القرائن
ياللي تقبّل وجه مفرودة الخير
اكيد ابوها وامها من الغوالي
تستاهل التقبيل دام انها غير
لا جالها الشراي يضرب باعلالي
خالد بن ناصر المخيمر - روضة سدير
نرحب بمشاركاتكم الشعرية حتى مساء الأثنين
على الايميل الخاص بصفحة الخزامى:
rb-khozama@alriyadh.com
أو الفاكس رقم: 4871070
ونستقبل الصور الهادفة والطريفة
زاوية ( صوت الصورة ) ..