باب الرجا للياس أنا ما فتحته

أحاول أمسح رسم وأثري نحته
رسم طبع بالقلب ما هو بقرطاس
ما ينمسح لو اجتهد ما مسحته
خص إن قلبي من مباديه حساس
قلب على كثر الخطايا نصحته
ويقول لو ضاقت علينا فلا باس
باب الرجال لليأس أنا ما فتحته
أخاف يدخل في كيان الرجاء يأس
لو الرجاء بحر عميق سحبته
أصارع أمواجه وجاذبه الاحساس
ليتك تداوي حرجك اللي جرحته
راعي الضمير الحي ما يجرح الناس
أقولها للي بعيني لمحته
في زحمة والناس تمشي وجلاس
في مواقف يبطي على ما شرحته
في لحظة ضاقت علي به الأنفاس
يمشي وكن الأرض مهيب تحته
كنه يدوس عروق قلبي إلا داس
عز الله إني رابح لو ربحته
ربح عظيم ولا يوزان بمقياس
اللي منحني سهم موت ومنحته
تاج الحسن يزهى على قمة الرأس
هاني بن محمد السلوم