الهواجيس

صار القبر عن جملة الناس سلواي
يرتاح قلب المشتقي في محاريه
كنه يقول اهلا هلا فيك يالجاي
ودّه يحدّد موقع القبر والفيه
خايف تضيع رسوم قبره عن خطاي
وانساه مثل اللي مع الوقت ناسيه
ذا لي ثلاث اعوام والقبر نجواي
لاجيت يمه قامت العين تبكيه
لاجيت احس انه على طول وياي
واخذ معاه من التسالي واسلّيه
كم حركتني بالهواجيس بلواي
كم جرّحت قلبي بقايا خواليه
لله در اللي فقد صايب الراي
من وحشتٍ تقلع رواسي عواليه
للريح ونجوم الدجى قِلت شكواي
لعلها تاخذ من الهم قاسيه
وا قلبي اللي حطمه هم ذكراي
عجزت مرور ايامنا عن تداويه
يا قبر ماني للمواثيق نسّاي
منساك لين العمر تفنى لياليه
عهدٍ قطعته يوم مدّيت يمناي
باوله ماخنته ولا اخون تاليه