العيد في عيون الشعراء

كثيرة وعديدة تلك القصائد التي قيلت في مناسبة العيد
يقول الأمير الراحل سعود بن بندر.. في العيد
أقول في نفسي وأنا أعايد الناس
متى بشوفك تكمل أفراح عيدي
أجامل وربي عليم بالإحساس
وشهو شعوري وأنت عني بعيدي
اللي خذاني لك على سهو هوجاس
حسيت نفسي وسط ربعي وحيدي
لو حسوا بما بي يقولون لاباس
بدال قولة على عيدك سعيدي
لاصرت عندي وقتي أعياد وأعراس
حتى ولو إني وسط سجنٍ حديدي
عاشرت خلان وتخالطت بأجناس
محدٍ سواك أهديته القلب بيدي!!
من تحت ما طا الرجل لي هامت الراس
كلش هويته فيك والله شهيدي
لقيت بك ذوقي وأنا قاطع الياس
ومعك بدا يحيا الأمل من جديدي
ويقول شاعر (اخر) بمشاعر حزينة وعدم اكتمال فرحتة وعبر قائلاً
كلن نهار العيد عايد حبيبه
وألتم شمل القلوب المواليف
وأنا حبيبي غايب الله يجيبه
ويا حسرتي كان انتهى العيد ما شيف!!
وهنا شاعر آخر يزف اصدق المشاعر للحبيب الغائب
عيدك مبارك صاحبي وين ماكنت
يزف لك نبض الخفوق التهاني
عيدك مبارك كثر مابي تمكنت
كثر الغلا اللي بالضلوع المحاني
او كثر مافي فرحة العيد حزنت
وارخيت لجيوش العذاب العناني
يوم التفت وشفت ماغايب الا انت
ضاق الوجود وكل هم" غزاني
تختلف المشاعر بين إنسان وآخر، والشاعر المبدع صنيتان المطيري يقول:
ياعيد مالك نظرة في عيوني
نسيتني مدري زماني نساني
ماقدرت افراحك تعانق شجوني
احزاني اكبر من كلام التهاني
حاولت اجاري فرحتك واكشفوني
لاجيت ابضحك ماستمرت ثواني
يقول الأمير خالد الفيصل:..((تشوقت للعيد))....
ياساعة الفرحه تشوقت للعيد
عيد العيون وعيد قلب الصبابه
رد الجمال لشوفتي يا أتلع الجيد
واسحب على حرفي لحون الربابه
حرفي بصوتك يا أجمل الصوت تغريد
يا رمز حبي هاك رمز الكتابه
يا صبح عمري فيك للعمر تجديد
وحبك يجدد كل يومٍ شبابه
للعيد والقمرا وحسنك مواعيد
وليل الهوى شرّع للأحباب بابه
ياما زعجت الصوت باسمك تراديد
ويا ما نسيم الوجد يمك سرابه
وياما تمنيتك على باقي الغيد
وأقول مثلك يا غلى الروح مابه
ياقطرة الغيمه على يابس البيد
رد الحياة لخافقي يا ذهابه.