السنين الجميلة

مرات أحس أني جسد فاقد الروح
يرزم ورى حدب الضلوع النحيله
وترحل به الغربة على التيه والنوح
وتهدي كتوفه للحمول الثقيله
ومرات أقول أحيان يقلقني البوح
ومن وين ماوجهة كيف الوسيله
مسموح ياحظي على ايش مسموح
على بخل كف العطايا الهزيله
اللي خذت مني مشاوير واصروح
وأحلام وطموحات ماهي قليله
واللي اسرقت من خافقي كل مصلوح
وشبت شراييني فتيله .. فتيله
كم لي أناشد عازف الفكر بوضوح
من وين اغني بالطروق الطويله
عمري تقاسيمه حكايات واشروح
واصدق صور فيها معاني جزيله
حتى سوالفي أصبحت صوت مبحوح
بعد انزحت نبض السنين الجميله
قولوا لمن ردد مع الطاير الدوح
لحن الخليل اللي تناسى خليله
أن الليالي الجهم ما تدمل أجروح
وان المفارق عودته مستحيله