ساعة صفاء

تقولي وش شغل بالك ونا كل انشغالي فيك
غريبه كيف ماتبغيني اتعجب من سؤالك
ونا بعت العذارى كلهن يابنت لجل ارضيك
يمين الله مابدل بحبك حبٍ بْدالك
احبك حب مايقبل ابد ياروحي التشكيك
احبك حب مايوصف ولا يخطر على بالك
أحبك اي نعم والله احبك حيل واحلم بيك
واعزف لك على اوتار الغرام الحان موالك
نعم تستاهلين الحب وإلا ويش له أغليك
عطيتك كل قلبي لك بلا مِنّه هنيا لك
مادام انك سكنتي به فنا معاد ابا وصّيك
عليه اعتبري انه قلبك الموجود بشمالك
والي منه خفق يابنت لك مقصوده يحاكيك
حذاري ينكسر منك لنبضاته خذي بالك
بلاه الله في حبك يفز لي من ذكر طاريك
ويتعذب ويتصبر على مافيه كرما لك
وانا اتخيلك في ساعة صفا كفي وسط كفيك
نعيش ابها وتتحقق لي آمالي وآمالك
حياتي كان ماودك تجيني فاسمحي لي أجيك
نفذ صبري وانا اترقب وانطر حزة وصالك
كفى قهري وتعذيبي وظلمي الله يخليك
تعالي واشفقي بالحال ربي يشفق بحالك