لي حبيب ٍلا طلبته تصدد

لي حبيب ٍلا طلبته تصدد
الغضب باين بداخل عيونه
لا يبيعٍ الود طبعه يشدد ‍
خابرا فيه السخا والليونه
من فواتير الندم لا يسدد
طول عمره يحترق في ظنونه
لا يغره من كلام ٍ يردد
‍سم في وسط العسل يصنعونه
العواذل في سماها تلبد
مظلمه في جوها يحسدونه
لو نزل ماها لهيب ٍ توقد
ودهم في ساعته يعدمونه
فم ولسان وكلام ٍ محدد
‍مثل حد السيف ما يرحمونه
لين ما تخرب بيوت ٍ تشيد
كل ركن ٍ فيه ما يتركونه
أن بغاني بالوفا له مجدد
‍طبعي اللي ما يفكر يخونه
وأن عكس سيره ودربه معقد
‍ما بكت عيني ونفسي مصونه
مقرن بن متعب الهرف