صوت الصورة

ياللي رفعت الجيب في رافعة ونش
أرفق ترى السايق بوسط الغماره
واحرص فلا تغضي لك من النظر رمش
من شان ناس حولكم به قشاره
محمد صالح الأطرش- رياض الخبراء
نبي نوصف يا جماعة هذا الجيب
جيب جديد وطايح وسط حفره
والناس من حوله عجايب وتعجيب
وراعيه وسط الجيب والونش جره
ماجد سعود الحريص
يالله عسى التامين غطى بداله
الموتر اللي غير الوبل ممشاه
اما سحبه الونش يم الوكاله
ولا جرا له ما حدا مقيط ورشاه
سعد الحماد- روضة سدير
أكيد راعي الجيب توه تورط
يبي السلامة مير مامن سلامه
فزع له اللي يوم تله وعرط
ما هو رعديد نايم في منامه
خليف الحربي- الرياض
عزاه لك يا راعي الشاص عزاه
وش اللي حدك على طرق المدينه
الشاص لفجوج الخلا يلزم علينا شراه
لا صارت حياة الشقاوي من الدار شينه
ذيب الدوسري
فكك ولي العرش يا سايق الجيب
من فخ هامور المشاريع خداع
حقه أخذ كامل ولا خاف تعقيب
وكلف بها غشاش جاهل وطماع
فهد بن عقيل الطويان- بريدة
حفرة عميقة ساقط وسطها شاص
ولابه حواجز دونها كيف الاهمال
سبة مقاول ينقصه بعض الاخلاص
واجب يجازى ولا يكلف بالاعمال
محمد بن عبدالعزيز الخنيفر
لا واحسافة راح ذا الجيب حسرة
يستعرض المسكين والسيل جارف
وتالي نخاهم ترى الحال خطرة
ومثلك يا بو هذال شايف وعارف
حمد عبدالله الوايلي
اللغز واضح عندنا صار معلوم
ولو هو صعيب اللغز لازم نحله
موسى دعا فرعون لا يظلم القوم
لا شك كابر واندمر في محله
فهد فهد عيد الشمري -حفر الباطن
نرحب بمشاركاتكم الشعرية على لفاكس (4871070)
أو الايميل الخاص بصفحة الخزامى:
rb-khozama@alriyadh.com
صورة العدد الماضي
زاوية (صوت الصورة) ونستقبل الصور الهادفة والطريفة.. ويا هلا.