هلا بك ياولي العهد

مرحبا يا خو عبدالله ويا خو فهد
مملكتنا بعد ما جيت لبست جديد
مرحبا بك هلا بك يا ولي العهد
والله ان جيتك يا سيدي يوم عيد
نحمد الواحد الحي العزيز الصمد
نحمد الخالق الرب الكريم الشديد
مرحبا بك يا وجه الخير وجه السعد
يوم شفناك طيب كل واحد سعيد
كل واحد ركع لله حمد وسجد
يوم شفناك سالم يالشجاع الفريد
كل شعبك تهنى في المنام ورقد
نحمد الله ربي جت على ما نريد
عام كامل وكن بعيون شعبك رمد
ما عرفنا السعادة وأنت عنا بعيد
الفرح يا طويل العمر عم البلد
تو زان الكلام.. وتو زان القصيد
ما نوفيك حقك لو بذلنا جهد
أمه إلا أمم في شخص مجد تليد
وأنت مالك مثيل الا المطر لاهبد
المطر لا هبد يسقي ثرا كل بيد
وانت مالك شبيه الا الفهد والأسد
قوباسك وهقواتك تفل الحديد
لو سألنا الكرم يالخو تقرب لأحد
لو نطق قال شف سلطان أنا له حفيد
والفقر لو سألته قال أنا مضطهد
مضطهدني كرم سلطان شفني وحيد
كم غني بجودك مال ماله عدد
وكم غني قبل تعطيه ماله رصيد
والله اللي رفع سبع بليّا عمد
ان غلاكم يسير بكل عرق وريد
سعود بن فراج المسردي القحطاني