سلامة اللي له بطولات وأمجاد

هبت ذعاذيع الهواء والفرح زاد
وكلن تباشر في سهيل وقدومه
اسعد خبر فاللمملكه عبر الأرصاد
يجلي عن القلب المشقّى همومه
ذاعوه وأصبح عندنا مثل الأعياد
وكلن يبشٍّر فيه ربعه وقومه
سلامة اللي له بطولات وأمجاد
أبو اليتامى اللي تنومس علومه
عسى العوافي تلبسه وين ما راد
اللي على أرقاب المكارم وسومه
كفه لفعل الخير والطيب معتاد
دايم على الفزعة تسوقه عزومه
يعط العطايا ما يحسب لها أعداد
من خاطرن راضي ونفسن رحومه
كمن يتيمن حارب الشرب والزاد
وكم معسرن ضاقت بنفسه هدومه
وكم واحدن مع سكة الضيم ينقاد
يحسب حساب الوقت لليله ويومه
وبهم تكفل سيدي سيد الأسياد
حتى لقى راع اللوازم لزومه
بالعز خلاهم على روس الأشهاد
وهاذي عوايده الجزال ورسومه
وبنا صروحن للمعاقين تنشاد
عن لاهب الصالي ولفحة سمومه
فيه الرعايه شاملة جمع وفراد
ما ينقص المحتاج قوته وقومه
مواقفه عظمى قديمات وجداد
متواضعن ما فيه شوفه وزومه
دايم بشوش وللصعيبات مسناد
له في سما الفزعات دوره وحومه
والجيش مطور معدات وعتاد
دون الوطن ما خطت مضارب سهومه
فالأرض دبابه وفالجو رواد
والدار من فعل الملوك محشومه