يا ضيقة الصدر وش تبغين من صدري

يا ضيقة الصدر وش تبغين من صدري
سيفك علامك على صدري تسلينه
هو نقص مني وعندك نازلٍ قدري
ولا طبيعه ومن مثلي تمرينه
وقفّت بينك وبين الوقت والغدري
ونظرت فالوقت يا مكثر مساكينه
ثم زادت الضيقه اللي تشبه الجمري
من حين كلٍ قرب ثم حد سكينه
حتى خوي الرخاء يدري ومن بدري
اني بحاجة ولكن ما الله امعينه
ينكر وفاي وجزاي ايبادله نكري
اعطيه جزله وهو يعطيني الشينه
يوم انها صمّلت ماهو على خبري
وفعل الردى للضعّيف دايم ايهينه
انا اشهد اني خسرت وباينٍ خسري
ياكيف شينه تجي مردود للزينه
لكن ابجري مع الدنيا وهي تجري
وابحتمل هالزمن في شده ولينه
حتى لوٍ الليالي صايره عجري
تبى تعدّل بذن من عزني دينه
اهم شي اتسلى واسمع القمري
لا قام ينشد بصوته في بساتينه