صوت الصورة

من يامن النمر ووليده
ويقول ذولا على راسي
لا والله ألا غدى صيده
وأصبح معنا ومنحاسي
فهد مطر المخلفي
أخطا على المدن من جابه
والله ما تبي تشوفه
بسرعة رجعها على الغابه
نفسه على البر ملهوفه
طلال مخلف الشمري - الأحساء
لو كان هذا نمر ما جيت من حوله
لا شك هذا نمر من صنع تايواني
وسط البراري يجي له صوله وجوله
ماهوب ذا مسكنه في وسط بستاني
عبدالمحسن محمد الجعفر - الرياض
لا تامن النمر يا مسكين
وأن جاع ما يعرف الخوه
يا من كلو واحدن واثنين
ضاع النشاط أو ضاعت القوه
عبدالكريم عبدالرحمن السلوم
يوم الهوا يشم راسه للنمر هيبه
لا أنا ولا أنت يقدر يقرب الكاسر
الموت قبل يتحنط في مخاليبه
ومن راهن أنه يهزم المفترس خاسر
سعود بن عبدالعزيز الهزاع - نعام
نمر أنيق يأخذ العقل لونه
أمظمره منهو على السيرك ناوي
من قبل فعله يقصر الهرج دونه
واليوم مستسلم ماهو على الطرد قاوي
خالد بن ناصر المخيمر
كل عظيم هادي لا غرور ولا تكبر ولا فيه طفقه
هيبته واثق فيها وينظر في جلال واعتزاز
لشخص متثبتٍ قدام وجهه وفي قلبه عليه شفقه
كنه اللي يحاول يعتقه ويقول يالنمر فيك الطيب جاز
جلعود لافي الشمري
يابو جوير الله يجيرك من النمر
دميه على شكل النمر وأنت عارف
أحسن لك تسولف على مطبق التمر
وتشرب قريب من الفناجيل طارف
حمد عبدالله الوايلي
لا تغرك بالهدو بعض السباع
واغتنم نفسك قبل شيء يصير
بظرف لحظة كم تغير بالطباع
وتصبح الوجبة في وقت يسير
محمد بن عبدالعزيز الخنيفر - أشيقر
هذا النمر حذرا توهق وتوذيه
لو قام يا بعده عليك السلامه
شف الجمل حقده على البعد يطويه
بالزور من يوذيه هشم عظامه
فهد بن عقيل الطويان - بريدة
السبع والبحر والعدوان والوادي
منها تحذر تحذر لو مية مره
يمكن يغيضه نباك وطبعاك الهادي
مزحه ثقيل.. وقليل.. فاتك شره
عقاب بن سقيان العتيبي - الجمش
أنت ياللي تعرف النمر وفعوله
النمور النايمه ليش توقظها
السباع الكاسره من يجي حوله
ويتحمل فعلها من تعرضها
سعدون ابن ظويهر العنزي
هذا نمر جد.. وإلا لعب جهالي
وتسوي إنك بطل.. تلمس يدينه
ترى العدو لو ضحك.. خله على البالي
إلى جفتك الليالي.. بان لك شينه
لطيفة العبدالرحمن - الرياض
النمر وحش ويكسر العظم نابه
وكفه يضرب به باسرع طريقه
وشبله صغير ولا كبر جاك مابه
وشره على الانسان لو هو صديقه
فريح بشير الضوي
نرحب بمشاركاتكم الشعرية حتى مساء الاثنين على الفاكس رقم 4871070 أو الإيميل الخاص بصفحة الخزامى:
khozama@alriyadh.com
زاوية: (صوت الصورة).. ويا هلا.