بلا قيود

اصعد على متن الثقافة للابداع
إن كان لك شف بمجال البراعه
منتب ورى استنساخ الأفكار منصاع
لهم قنعة وانت عندك قناعه
لا تلتزم بالغير وتكون تباع
شق العصا بالقاف من غير طاعه
تفرد بحرفك ودندن بالاسماع
بالشعر تفلح لا تركت الجماعه
كونك تفارق بالشعر أهل الاجماع
هذي تراها بالحقيقة شجاعه
مقيد نفسك بلا قيد مناع
على الاقل يا فلان ساعة وساعه
الحر يكفخ للسما ما بغى القاع
عن الدنو محشوم عنده مناعه
يا راعي الكربون ما للحكي داع
السهم ما والله يزيد ارتفاعه
اللي يحب الأرض ويعاف الاقلاع
لابد تقصر نظرته واطلاعه
الريح نعمة والبحر موج وضراع
والشخص قارب والتفكر شراعه
أنا زبون الخصب والراس طماع
لو اقطعه ساعات حس بمجاعه
مستنجد بالنور من فكر لماع
كونت شمس مشرقه من شعاعه
والإمعة محقور في كل الأوضاع
ماله إلى حان التقاضي شفاعه
رغم الهزل والمسخرة حد الاشباع
أكبر مروج للفشل والإشاعه
ودام الأبو للابن محبط وقماع
عزم الابن لابد يعلن وداعه