فلاش

كلمني واحد من الشباب المتحمس.. وقال أنت فلان.. قلت ايه.. قال: شف أنا من أكبر الهكرز بالمملكة واعرف كل ما يدور بالإنترنت وبرامجه وبلاويه.. أقدر أشيل ملف من عندك واحط ملفات بغمضة عين.. وأنا تبت إلى الله توبة عن الشغل اللي سويته وندمت وارسلت لبعض الناس اعتذاري وإن شاء الله إني صادق. لكن عندنا للأسف مواقع بالإنترنت سواء الغرف أو الماسنجرات أو الشات تشوف شباب ضايع.. مدهورتهم المخدرات وأنا مستعد أسهم معكم ضد هالمواقع هذي أو ضد اللي يروجون هالسموم.. ويمكن فيه ناس ما يعرفون شيء عنها وبعضهم شخصياتهم ضعيفة وما هم ذاك الناس ويصيرون ضحية لها.
قلت بيض الله وجهك وجزاك الله خير وما نستغني عنك وعن جهودك.. وحنا بدورنا بعد نقول لكل أبو وكل أم إنهم ينتبهون على عيالهم وبناتهم من غرف الشات ويراقبونهم بين فترة وأخرى ولا يغفلون عنهم.. ويالله سترك.
الأبرق