فلاش

اتصلت إحدى الأمهات وقالت: كان ولدي من المتفوقين في الابتدائية والمتوسطة ولاحظت أنه تغير في الكفاءة ولاحظته أكثر في أول ثانوي.. سهراته مع أصدقائه كثرت.. سلوكياته تغيرت.. درجاته اندمرت.. قلت لبوه الولد متغير علينا خلنا نوديه لطبيب نفسي.. كشف عليه وقال ولدكم مدمن مخدرات.. أغمي عليَّ يوم سمعت هالكلام المهم وديناه للخارج ودخلناه مستشفى وجلس هناك شهرين إلين تعالج وجبناه عندنا في الرياض ورجع لربعه الأولين وصار يتعاطى أكثر من أول.
وزاد شي جديد علينا وهذي مصيبة الله يبعدنا وبلدنا عن هالأمور.. صار يفكر بخواته تفكير شين المخدرات دمرت عقله.. تدري وين خواته ألحين اللي عند خالتها واللي عند عمتها.. وأخذت تصيح وتقول أول كنت أقرأ عن المخدرات.. وأقول إنها بعيدة عننا وما توقعت إنها تبي تصير بلوى في بيتي.
الله يكون في عونها.. ودعيت إن الله يعافي ولدها من هالسموم ويرجع مثل ما كان وأحسن.. ويالله سترك.