بزايد الحسن مفضوح

لا تنظرون الزين لا من تسوح
خلوه يشفي علة القلب ويروح
يرتع قدم عيني واذا صحت روّح
وان راح تلقاني من الوجد مطروح
ما دام حبه من ورى الحدب طوح
اكيد باني له بقلب العنا صروح
ماني بقايل فيه مثل الملوح
حتى لو اكتب حرف قافي على لوح
لن الحروف لعطر وصفه تروح
واخاف اذيع بخافي السر وابوح
من كثر ما غلي صاحبي قمت ابوّح
ببيات شعر قافها ينعش الروح
الشاهد الله بالمفاتن تشوّح
تقدر تقول بزايد الحسن مفضوح
فيه الوصوف بكف حسنه تلوّح
للطهر والعفه على هامته ضوح
قلبي بحبه ياهل العرف فوّح
فوح الدلال الصفر لا جالها فوح
مالي جدا يا كود اهوجس وانوّح
واجاوب القمري على عالي الدوح
صحيح من زايد غلاه آتآوح
لكن اقول انه بلا شك مسموح
تميت قافٍ جزل صدره على أوّح
من شان عينه صار عجزه على اوح