فلاش

قلنا الرياضة تشغل وقت الفراغ وتعقل بعض الشباب المراهق.. وتخليهم يجلسون بالبيوت ويتابعون المباريات قدام أهلهم.. وهذا شيء طيب.. بس اشغلونا أصحاب القنوات الفضائية بالتشفير.. وسحبوا عيالنا للمقاهي.. اللي ما تدخلها لين تطلب معسل وإلا جراك.
وشوي شوي ويتعرفون على اللي يسوي، واللي ما يسوي.. والمضحك أن حقين المقاهي يكتبون ممنوع الدخول للي عمره أقل من ثمنطعش سنة يقالهم أبروا الذمة.. وليا دخلت تلقاهم أصغر من العمر اللي كتبوه.
لا.. والمحزن بعد.. جمهرة هالصغيرين عند محلات "الكوفي شوب" لا صار فيه مباراة مشفرة.. لازم نشوف لنا حل لها المشكلة اللي تعرض عيالنا للخطف.. والمضاربة.. والدشرة.. ورفقاء السوء.. والمخدرات.. وياالله سترك.
"الأبرق"