المشاهير

تُعد المساجلات الشِّعرية من أصدق أحاسيس الشاعر المؤثرة في النفوس، حيث تفيض بمشاعر الود والتقدير والتوجيه، وذلك من خلال المواضيع التي يختارها الشعراء، والأخذ والرد بينهم في هذا الفن واللون المحبوب والمطلوب نظراً للانسجام الشاعري والفكري بين معظم الشعراء.
ومن المساجلات الجميلة التي جرت بين الشاعر سلطان بن حسين بن محمد التمامي قصيدة تحمل مضامين هادفة وصادقة، من أبرزها الحث على المراجل والنبل والشجاعة، وقد وجهها إلى لشاعر محمد بن عبدالله السهلي الذي ثمن هذه المشاعر وذلك بردّه الجميل بانتقاء المفردات الجزلة.
الصوت:
للشاعر سلطان بن حسين بن محمد التمامي
ترى الرجال عقول ولسان وافكار
وكلٍ يعرفونه على قدر حاله
وما دام ربك حط لك سمع وابصار
ملزوم تكتب عن حياتك رساله
امّا تصير من المشاهير بيطار
ولا تسمى في حياتك حثاله
احدٍ يسمى من مشاهير الاشرار
قضت حياته فالجهل والرذاله
واحدٍ يسمى من مشاهير الاخيار
كلٍ يعرفه بالثنا.. والعداله
واحدٍ غيور وفيه حسد وغدار
قلبه مريض وتعرف الناس حاله
كلٍ يديره من حقود.. ومكار
مثل الرحى يمشي على من مشاله
ما عنده احساس الى سمع الاخبار
من جاه يمشي له على شف باله
وناسٍ يحبون المشاكل والاضرار
عيبٍ عليكم يا وجيه العماله
تمشون فالظلما وتطفون الانوار
والناس تدري عن دروب الجهاله
يا زين قطع الدرب عن كل جبار
ساس الخراب الله يعجِّل زواله
في كل يومٍ له مع الناس مشوار
قضت حياته فالحسد .. والنذاله
وصارت حياته كلها هموم وخطار
وحتفه على كتفه يشيله الحاله
ولا صار بعض الناس لا دير يندار
يصير مملوكٍ وتحت الكفاله
والشاعر محمد له انظار واشوار
وبحكم رايه والفعل ينشكا له
الصدى:
للشاعر محمد بن عبد الله السهلي
حي البيوت اللي كما قطف الازهار
من شاعرٍ قطف الزهور استوى له
ضخيت له من هاجس الشِّعر تيار
عساه يبلغ ذروة اللي طرا له
وجّه لراداره على الفور رادار
واظهر على الشاشه رموز اشتغاله
وسجلت مضمون الحقايق والاسرار
وسميت باسم اللي عزيزٍ جلاله
بعض الرجال ازوال وطوال وقصار
يمسِّس الغتره ويسكب اعقاله
لا يعمّر الديره.. ولا يهدم الدار
متكفكفٍ ما يلتفت في اظلاله
وبعض الرجال اعلومه اهزال واكثار
والعلم عند اللي تربي اعياله
وبعض الرجال امخادعيٍّ وقمَّار
يغر فكر اللي يطاوع مقاله
وبعض الرجال يعيش جمّاع دينار
تعبان والراحه لوراث ماله
وبعض الرجال بدون الاموال تجار
اهل الوفا والمرجله والشكاله
ربيع ضيف وفيةٍ تكرم الجار
وقدرٍ وتقديرٍ وفزعه وطاله
ودين وقبالٍ زين في سر وجهار
وصدق ومعرفه واحترام وجزاله
شرواك يا سلطان يا نسل الاحرار
وكلٍ على الجمّه يورد احباله
ومن سار فالظلما ترى دربه ايسار
وعدو عينك مثل حاله وفاله
الله يبينهم على كل منظار
يدعى على المفسد ولا يندعا له
وصلاة ربي عد همّال الامطار
على رسول الله محمد وآله