لا تستدر الهم

يا صاحبي والهم لا تستدره
ماحدن سوى ضلعينك اللي درا به
يفوح صدرك من لواهيب حره
وعقيلك المطفوق فاقد صوابه
للناس لا تكشف عن اللي يضره
ولو ان ماعندك همومٍ تجابه
يغرك اللي ساكنن في المجره
مع فلتر التصوير داخل حسابه
ياكل تميز الصبح مع فول جره
وبالليل ساكن وسط بيتٍ خرابه
يا صاحبي وان ضقت مليون مرة
فاشره على خدٍ يشيل السحابه
بالكون ما مثلت مثقال ذره
عند ابعد الاقصين والا القرابه
ان كان ما تصنع لقلبك مسره
ماحدن بقايل مات بأول شبابه
مخطور حتى القبر ما حدن يمره
وعلى مفاطيح العزا كالذيابه
ومنطق حياة الناس كانك تشرّه
واحد مثل غيره يروح لترابه
حنا بزمن يا رب تكفينا شره
كنا نعيش أحيان في شبه غابه
واليوم دام امورنا مستقره
ترى البشر باحوالهم في تشابه
الفرق بالمنظار حلوه ومره
وكنز القناعة كنز عز ورحابه