يوم الوطن يوم الفرح والبطولات

يوم يذكرنا بتوحيد دوله
توحيد دولة عِز كانت متاهات
والامن فيها عَز ما احد يطوله
يوم به الدوله نست كل مافات
جوع وخوف ومعضلات مهوله
وجاها اخو نوره زبون الصعيبات
واستسلمت له قبل حزة وصوله
معه رجال ينطحون المهمات
واذا انتهت جوله يخوضون جوله
حتى جمعها وانتهن الملمات
والخوف عنها راح واعلن أفوله
من حد نجران لشمال القريات
ومن بحر جده للقطيف وسهوله
الملك للمعبود رب السموات
ثم لاخو نوره زعيم البطوله
وكل القبايل له تخط الشعارات
حيثه ملك هيبه بفعله وقوله
عقب التناحر واشتعال العداوات
صاروا تحت ظله اخوان وحموله
الشعب في ظله بخير ومسرات
سبحان من أسقى القلوب بقبوله
عساه بالجنه ديار الكرامات
حيث ان نفسه للمكارم عجوله
وخلف لنا اشبال وساده وقادات
زحول الوطن دامه فخر في زحوله
(سعود ) مع ( فيصل ) ليثوث الصعيبات
وخالد بطييه طيبات فعوله
و(فهد ) سطع مجده بعال المجرات
بسياسته كل البشر صفقوا له
و( عبدالله ) المحبوب جزل العطيات
حيثه جمع بالجود عز ورجوله
لهم مكانتهم بكل المسارات
وكل خطب ينزل بالسيوف ارتكو له
ندعي لهم بجنان عدن مريفات
والكل منهم نفتخر في فعوله
ثم وصل حكم الوطن طيب الذات
سلمان مجده فوق ما احد يطوله
يسقي عدوه سم في كل الاوقات
وعدوان حزمه منه صارت جفوله
و للشعب ريف وخير جود ونفحات
بجوده غلب ديم المطر في هطوله
وولي عهده كيف ابوصفه بابيات
وهو انفرد بالمجد عرضه وطوله
في حكمته اسس لمجده علاقات
له نظره عند الشدايد شموله
وبهيبته خرت لهيبته سادات
حتى ان سادات الدول اذعنوا له
يبرد كبود الشعب بابهى القرارات
ويجعل كبود اعداه دوم امعلوله
وفتح على حرب الفساد الملفات
وقدم لصعبات المشاكل حلوله
ومن هيبته صارت جميع الزعامات
تطلب رضاه و تسمع اللي يقوله
المجد سجل له بابهى السجلات
مكانه فيها الشعوب شهدوله
وكل يبي مثله ولكن هيهات
مافيه مثله حي فعله وزوله
وعش ياوطنا بخير طول السنوات
وأيادي العدوان عنك امغلوله
ونفديك بانفسنا ولا به مراوات
وعنك نلتقى الشر حزة حصوله
وصلوا على الهادي لخير الرسالات
عد الزمان وما تناوب فصوله