يا راعي الموتر على الهون بالهون الحمل فوق المستطاع وخياله

يا راعي الموتر على الهون بالهون
الحمل فوق المستطاع وخياله
حشرت لك حاشي على الخط تمشون
في شنطة الموتر ترى الحال حاله
احذر تصيب الناس والوقت مرهون
ترى الخطر واضح من اول مجاله
حمد عبدالله الوايلي - حوطة سدير
يا جمل فيما مضى شِلْتهم دوم
واليوم بالشَّنْطه وهُو عالِم النِّيَّه
يمكن مدَاوَاتك مِن ارضوض وكْدُوم
وَلاَّ إلى القَصَّاب تِسْعين بالمِيَّه
والذَّنب ياقَع والجزاءات واللَّوم
لمِن اطْلقك وسْط السِّكك للمِنِيَّه
سعود عائش الحربي - جدة
يا شايل المفرود وين انت ذاهب
محمّله في موترك ليه.. ثم ليّه
دربك على القصاب لازم تحاسب
الله يفكك من شرور.. وأذيّه
خالد بن ناصر المخيمر - روضة سدير
يا حيف ياللي حط حاشي بسيدان
وين الدينّه ذي تشيل الحواشي
أقول أنا مخطي وراعيه غلطان
عليه منقودٍ وهو فيه ما شي
محمد عبدالله الشهري - جبل اثرب
نرحب بمشاركاتكم الشِّعرية،
وما تلتقطه عدساتكم من الصور الهادفة
والطريفة على إيميل الخزامى:
rb-khozama@alriyadh.com
صورة العدد السابق