المعاناه

ما هو صحيح إن التعب والمعاناه
تعطيك يا ابن آدم تميز وقيمه
بالعكس كم واحد تعنى بدنياه
ولا حصد من زرعه إلا هشيمه
أمضى شبابه بين ياسه ورجواه
وشيب وشابت أمنيات وعزيمه
لحظه تأمل من حمل وقته اعياه
بعيونه تلاحظ حكايه أليمه
وهندامه وحكيه وطلة محياه
ترسم بعد صورة كفاح وهزيمه
حلمه بسيط وعاند الحلم ما جاه
مكتوب والمكتوب الله عليمه
وافهم ترى بعض الأقاويل مبداه
تطييب خاطر لا تحسبه غنيمه
هذا هو الواقع مثل ما رأيناه
ما غيره تنظير فكره قديمه
وما غيره البعض إن حقق مناه
نقصد عموم اللي بأرضه مقيمه
واللي وصل بعد الشقا شي يهواه
يمكن فقد أشيا بوقته عظيمه