يازِين شَوف الذود تمشي بالأقفار

يازِين فَالرَّوض الخَضَر شبة النار
والكيف في صفر الدِلال المصافي
هذي بها هيلٍ وهذيك مسمار
وسوالفٍ بين النشاما نظافي
في عَثعثٍ نبته خزامى ونوّار
والريم فيها والوضيحي يشافي
يازِين شَوف الذود تمشي بالأقفار
إليا أقبلَن وإن كان راحَن مقافي
ذودٍ مغاتيرٍ منقّاه وخْيار
متلحفات شحٌوم ماهِن ضعافي
أٌم الوجِيه الطيّبه حِسك للأوبار
سفن الصحاري قاطِعات الفيافي
يازين صوت عْيالهن وقت الأسحار
إليا إستعدَن ورْزِمَن للعطافي
ثم سْرَحن من فجر والطير ما طار
وْمقفهورهن يبرالهن من خْلافي
ويازين شوفَتهن على وقت الأفطار
وحليبهن من كل مطعوم كافي
شعر: فيحان القعياني المطيري