تهادى سحاب الوَسم يالله تجيب الخير

على جرهدٍ باقي مواريه يبّاسِه
تحدّر من القبلة على زمّته ومذير
تسوقه هبِايب نجد ياحلو نسناسه
تنكّس بروقه فوق متنه تنكّس طير
إليا قام يلعب بالهوى في تنِكّاسه
تسَبّح رعوده للوِلي خيفه وتكبير
يصحّي حنينه من سَرق عينه إنعاسه
تمثنى الفيافي وانتثر ماه وقت عْصير
تملّت دعوبه بالحيا وطاب عسّاسه
تمرّغ على وجه الثرا وأجهد التمطير
تقل شايلٍ شوق المحبين في راسه
فياضٍ زها في خدّها العِشب والنُوّير
وذعذاع نودٍ يجلي الْهَم وعْماسه
تِسج القدَم سجة غريبٍ مع التفكير
إليا من طرت له دار خلاّنِهُ وْنَاسه
شعر: زعل بن عايد الرشيدي