نفذت أوامر دولتي ماتوانيت

مضن تسع ساعات محجوز بالبيت
ويمضي عليه مثلهن كل يومي
وسويت لي فنجال بنّ وتقهويت
وفتحت جوالٍ يجيب العلومي
يوم الكرونا جا يتحدى تحديت
لا طاح ردي العزايم نقومي
نفذت أوامر دولتي ماتوانيت
من خوف يلحقني من الناس لومي
ويوم ان ابو فهد نخانا تعزويت
وقلنا له أبشر كل ربعك قرومي
أبشر بعزّ وبالفزع يوم ناديت
تبشر بعزك يا قوي العزومي
وولي عهدك جاء على ما تمنيت
إليا انتخى مثل الحصان العزومي
من شبته يمشي على ماتوريت
وإن كبرت القالات رجلٍ جزومي
ياليت مثله قدر مليون ياليت
زيزومها ياصار بالجوّ حومي
ولا يمكن أنسى أبطالنا يوم عديت
على الحدود جبالها والحزومي
يا لاقوا العدوان مثل العفاريت
عدوهم يرجع وراه مهزومي
وأخوانهم بالأمن ماعنهم أغضيت
أمن الوطن مايبدلونه بنومي
والمدح طيب وحق للي لهم صيت
ملايك الرحمة ليا جاء اللزومي
متكاتفينٍ بالعمل دون توقيت
ماهمهم برد الشتاء والسمومي