غيثٍ يباس العود يروي عروقه

جعل السحاب اليا تلاحت بروقه
يُومر على نجدٍ يهلّ الهماليل
نوٍّ ثقيلٍ مالياتٍ حقوقه
يآخذ ثلاث أيام ليلٍ بأثر ليل
منشيه ربٍ للخلايق يسوقه
ربٍ كريمٍ يرحم الناس لا سِيل
غيثٍ يباس العُود يروي عروقه
والأرض باذرها يجي له تشاكيل
عقب البطى يالله كنْها امحروقه
ما عاد فيها غير عجّ ودراكيل
لا سيَّل الوادي فلا شِنْ يعوقه
واللي نزل وسطه يحدّر به السَّيل
من قوّته في الخَد بانت شقوقه
لو حِطّ من دونه عقوم وتحاويل
يقوله اللي كل روضٍ يشوقه
شوف الربيع ومنبته في الغراميل
محلاه لا جاء الصبح حزّة شروقه
وصوت ام سالم غاديٍ له مواويل
بين الخزامى والنفل مَدّ شوفه
ولا عاد للجوال فيها مراسيل
ما هوب زَمْلٍ لو تطاول اطروقه
لا سجّ وابعد عن هلَ القال والقيل
ينساح لو نفسه عليه امغلوقه
لو كان غرقٍ في هموم وغرابيل
عبد العزيز العنقري