صوت الصورة

أنوار عشاقٍ لسحر البحيره
تشدا نجومٍ خلف وجه الضباب
وناسٍ لها لافين عن كل ديره
بان نور القمر مع كثر السحاب
لقطه بها الفنان أرضى ضميره
نالت برايي من كثيرين الاعجاب
سعود عائش الحربي - جدة
هذا شعيبٍ ينتهي حوله نفود
في روضةٍ حلوه ومنظرها حلو
على ضفاف الرمل والمويه تزود
يا زين هالمنظر إلى صرت ابعلو
جلسه جميله مالها حد وحدود
ليلة بدر والنور عاكس في خلو
هذا حلاة الوقت يا نسل الجدود
اشرب تراها ماتجي دايم سلو
حمد عبدالله الوايلي - حوطة سدير
الصوره اللي شوفها يسحر العين
بضواحي الزلفي عساها مد يمه
بحيره يشوقك شوفها يالمسلمين
الله كساها بالمطر من نعيمه
منظر خيالي يا حلاة الكشاتين
مويه وعدة طبخ ماطور خيمه
تبطي تنافسها فرنسا وبرلين
نجد العذيه والنوايا سليمه
خالد ناصر المخيمر - روضة سدير
الحمد للي نزّل الغيث بأمره
سالت به الشعبان هي والتلاعي
من دومة الجندل إلى ديار مره
إلى القصيم ديار خير ومراعي
ومن الجبيل إلى فياض حره
بأرض المدينه حصنها القلاعي
سالت بها الوديان مره ومره
أسبوعين وأسبوعين دون انقطاعي
عبدالكريم النغيمشي - لوذة
السيل عم بلادنا كل الاقطار
والحمد للمعبود ربٍ عطاناه
لكن لقينا الناس تركض للاخطار
تمشي بلا تحذير والفعل شفناه
كم نفس راحت بينها صغار وكبار
سبّة تفاخر .. كم حبيبٍ فقدناه
محمد عبدالعزيز الخنيفر - أشيقر
أفضل مناظر مصوره شفتها بليل
بحيرة نالت من الكل الاعجاب
النور عكسه فالبحر حط تشكيل
كنه ذهب والماس في اجمل ارقاب
سعود عبدالعزيز الهزاع - نعام
زين المناظر سعوديه
تفرق على كل الأوطاني
أرض الشرف أرض محيه
ينعم بها كل إنساني
عبدالكريم عبدالرحمن السلّوم- القرائن
الخير جانا وكل الناس فرحانه
بلادنا عمّها والسيل غاطيها
بأنحا وطنا بها الخيرات مليانه
غطى الصحاري وشامل كل أراضيها
بعض المناطق نشوف اليوم غرقانه
من سو تصريفها والبعض ناسيها
الناس من فعلها بالحيل حيرانه
تبي علاجٍ سريعٍ من يداويها
ريان محمد الخنيفر
نرحب بمشاركاتكم الشعرية وما تلتقطه عدساتكم من الصور الهادفة والطريفة على إيميل الخزامى:
rb-khozama@alriyadh.com
أو الفاكس رقم: 0114871070
ويا هلا..
صورة العدد السابق