عليك من رسم الفلايح مثل تاج واللي لهم خبرة لهذا يعرفون

بالجيب ميرندا وزنبيل واسراج
وقميصه اللي يشبه الحبر باللون
قل لي طريقك وين ذاليوم منهاج
بعض التراث اللي جمعته به افنون
عليك من رسم الفلا يح مثل تاج
واللي لهم خبرة لهذا يعرفون
علي الرشيد- رياض الخبراء
يا ما حلا صورة الفلاح
والغرشه اللي بمخباته
دنيا تبي صبر .. واكفاح
الوقت كله ابمسحاته
والصبر للفرج مفتاح
ما فيه خذ .. ولاهاته
عبدالكريم عبدالرحمن السلوم - القراين
ذكرني اللي شايلٍ محفرة خوص
فيها خضار ملحفة نبت برسيم
والسراج يغذي شمعته قاز مخصوص
يسفّر عليهم مثبت بهامته سيم
وطاقيته والثوب ازرق به فصوص
بمخباه مرندا على القلب من الضيم
بارد من الدكان في خياش مرصوص
زمان جيل الطيب مع قل تعليم
سعود عبدالعزيز الهزاع - نعام
المحدره فوق المتن وسطها أعلاف
وسراج محمول علي اليد طافي
وجرة ميرندا نذكر أيامها طاف
يمشي بها الفلاح يبي الكفافي
والرازق المعبود بالعبد رواف
هذا زمان أول مشى في عوافي
عبدالمحسن محمد المحيسن - رياض الخبراء
يا زين ما نوصل الحاضر بماضينا
لا صار مابه تعارض يربك الحالي
من كل وقتٍ نشوف التمر يغذينا
وميرندا مع فانوس من ماض الأجيالي
وقفة رطب عن نزول السوق تغنينا
في شهر في الحساني عشرة أمثالي
وهذا السراج الذي يا خوي يضوينا
لا صار بالكهربا يا ناس الأعطالي
وما حبّه أجدادنا مغروس فينا
في معظم أحوالنا في كل الأحوالي
سعود عايش الحربي - جدة
عاصبٍ راسه وشايل له زبيل
يجمع المحصول في زرعه يبين
والسراج معلّقه منظر جميل
والمرندا يوم وقت الطيبين
اه ياعصرٍ مضى عصر الأصيل
كاسبين الخير من جهد الجبين
ما تحرّوا رزقهم من يد البخيل
اوحسود النفس مرضان وغبين
حمد عبدالله الوايلي - حوطة سدير
متمسكٍ بتراث الاجداد حيوه
سراج مع زنبيل اتراثٍ قديمي
يشيله الفلاح مشكور هنوه
هذا التراث اليوم مثله عديمي
محصول من وسط الحيايط جابوه
يا طيبهم طيباه جعله مديمي
محمد عبدالعزيز الخنيفر - أشيقر
معرض تراثٍ مكتمل يمشي بهون
ما تدخله يا كود تنظر وهو جاي
من دون رسم تناظره وانت ممنون
يكفيك عن زورت معارض ورح جاي
شوف الخصف مليان به تمر مصيون
وشوف السراج معلّقه كنه الناي
عبدالكريم النغيمشي - لوذة
يا زين شوفة منظرك وأنت فلاح
مخرف على كتفك وبالجيب بارد
شكل الميرندا يذكر بوقتنا اللي راح
يوم الفقر لوجيه الرجاجيل طارد
خالد ناصر المخيمر - روضة سدير
زنبيل وسراج لها سنين وعصور
ومرطباتٍ كم لها عدة سنين
اليوم شفناها بها الكل مسرور
بجهود منهم دايم الطيب ساعين
يا مالها ذكرى.. ويا مالها حضور
الله اكبر يا زمان الوفيين
واللي رحل معروف بالخير مذكور
وقفاتهم لتراثنا دوم بانين
ريان محمد الخنيفر
شَدّ السواعد للعمل طيّب الفال
في خطوته ثابت ولاهي خفيفه
يحمل على كتفه أدوات الأعمال
يالله عسى التوفيق دايم حليفه
بشائر القحطاني - الرياض
صورة العدد السابق