ياملكنا عاد عيدك

عيدي يالمملكة عيدك مبارك
عاد عيدك ياوطن في كل عيد
انتي اللي بالفرح عيدك تبارك
ياعساك بخير في عيد سعيد
انتي اللي ربنا زاد اعتبارك
شرفك قبلة على كل الصعيد
مهبط القرآن والوحي المبارك
منبع الإسلام والنور الاكيد
بين كل الأرض قد حل اختيارك
تحضنين البيت والدين الفريد
كل مسلم يا بلدنا جا وزارك
قبلت الإسلام من عهد بعيد
فيك بيت النور زود في منارك
فيك مسجد سيد الناس الوحيد
كلمة التوحيد عنوان لشعارك
لااله الا الولي حي حميد
عيدي بامان في ليل ونهارك
عيدي جعل الفرح دايم يزيد
ياملكنا عاد عيدك وسط دارك
شوفتك ياسدي عيد جديد
انت نور المملكة مالك مشارك
ياعسى عمرك على الدنيا مديد
خادم البيتين من طيب اختيارك
فضلك ربي على غيرك اكيد
تنصر الإسلام وتحامي لجارك
فيك نخوة للعرب دايم عضيد
شرع ربي يا ابومتعب في قرارك
حاكماً بالشرع والرأي السديد
حفظك القرآن زود في وقارك
تطبعه وتوزعه للمستفيد
تشهد البيتين عزمك واقتدارك
تشهد الحجاج والله الشهيد
باذلاً جهدك بعزمك وافتخارك
خدمة الإسلام تجري في الوريد
مضرب الامثال في خطة مسارك
عن طريق الحق لا يمكن تحيد
يا ابو متعب امنك ربي وجارك
من صواديف الزمن جعلك بعيد
سربنا ياسيدي حنا نشارك
سر بدولتنا الى المجد المجيد
شعبك اللي ما يخاف من المعارك
في سبيل الحق نفدي بالمزيد
ياوطنا عشت مرفوعاً شعارك
نحفظك يادار لو حنا نبيد
ما نفرط ياوطن لو في غبارك
من يفرط فيه جعله ما يفيد
من كبير السن اليا حتى صغارك
كلنا متكاتفين ايد با ايد
عيدي يالمملكة شعبك يبارك
عاد عيدك ياوطن عيد سعيد