مات الزعيم اللي فجعنا رحيله

يسقيك ياقبر الملك وبل الامطار
مخيلةٍ تمطر بأثرها مخيله
مات الملك و استوحشت عقبه الدار
مات الزعيم اللي فجعنا رحيله
مات الزعيم المخلص العادل البار
مات .. وترك له منجزاتٍ جليله
كذا العظيم ان مات يترك له آثار
وعبدالله آثاره كبارٍ جزيله
حاكم حكيم ومن بعيدين الانظار
ومن سنة المختار ياخذ دليله
يا كثر ما سموك يا نسل الاخيار
( صقر العروبه ) ( منجز المستحيله )
اسمك ( حكيم العرب ) في كل الاقطار
وتشهد مواقفك الكبار الاصيله
اسمك دليل المجد و العز و الكار
وسيرتك بالامجاد سيرة طويلة
غايتك دايم رفعة الدين و الدار
ومن شان غاياتك بذلت الوسيلة
عطاك للامة و للشعب مدرار
يجزاك ربي من عطاه و جميله
كم كنت تكرم شعبك و تكرم الجار
يا فزعة المضيوم زبن الدخيله
تتعب لجل عز الوطن سر و جهار
وكم شلت عن شعبك حمولٍ ثقيلة
حملتنا في داخلك رمز و شعار
ونحملك حب و ذكرياتٍ جميلة
نرثيك بدموع المحاجر و الاشعار
و الشعر يكفي عن كثيره قليله
في ليلة الجمعة توفتك الاقدار
الله كتب ترحل بليلة فضيله
والشعب كله يدعي بوقت الاسحار
وكم كنت توصي بالدعا كل ليله
يبكيك شعبك كله صغار و كبار
وشلون ما يبكيك وانته خليله
عساك فالجنة مع الصحب الاخيار
و يشفع لك المختار راع الوسيلة
ويجيرك الرحمن من واهج النار
و يجعل مقرك فالجنان الظليلة
عماد الشريف