درب الهوى صعب

قال الذي شرّف بروس المراقيب
شرّفت أنا من فوق عالي الرجومي
أشرفت مشرافٍ عليه التجاريب
جرّبت حِب البيض وأثره سمومي
قلبي تولّع بالبنيّ الرعابيب
جاني من الخفرات موت السهومي
عقب الهنوف اللي تمدرى على السيب
من شفتها عيّت عيوني تنومي
مزيونةٍ فيها حَسِين التعاجيب
مصيونةٍ تزهى جديد الهدومي
ما هيب تمشي في دروب العذاريب
ولا هيب تدفع للتكاسي رسومي
يا ونةٍ ونيتها ونة أمصيب
ونة كسيرٍ طاح وسط الحزومي
ما فاد فيه من الدوا والتطابيب
ودواه عند اللي يدير الغيومي
درب الهوى صعبٍ على الرَجل وتعِيب
عزّيه من مثلي كثير الهمومي
قمت أتشكّى للولي عالم الغيب
اللي على المخلوق ربٍ رحومي
إما تليّمنا على السَلْم والطيب
وإلا عليها قمت أذرّف دموعي
وصلوا على اللي رتّب الدِّين ترتيب
إعداد ما غصنٍ بالأشجار يومي