مهرة الحلم!!

والله.. إنك قادره يامهرة الحلم الأصيله
تشعلين الليل شمس.. وتوصلين العشق حده
أقبلي.. مادامت الأحلام يمناها طويله
تكسر الأغلال بالإصرار والحاجز تهده
الظماء فعروقنا والنبع يغري سلسبيله
كذب.. محدٍ يمنع المحتاج عن شيٍ يوده
الوهم.. عشعش ثمان شهور واسرج نصف خيله
يشحن الأفكار لين الرووس نامت فالمخده
كل ما لاح السراب (الخوف) قلنا يا حليله
من غبانا ننخدع في شي هزله فاق جده
الحلول الممكنه بعيوننا اضحت مستحيله
والله إنه وضع ماحنا يابنت الناس قده
ليه مانقدم..ترى الأيام فزعتها قليله
ليه نفتح للتردد نافذة هاته ووده
لامتى نستعطف المجهول وكفوفه بخيله
وشهو اللي صابنا والعزم بالتفكير شده
هاتي كفوفك.. وهاك الصدق والدرب ودليله
والله.. إني لأعسف الحرمان وآطا.. فوق خده