اللي عذلني

يا بعد ضحكات الفرح عن وجه مجروح الضمير
ما يضحك اللي فيه جرح الا ليا حصل دواه
ويا خل ما يقطع ظما العطشان رشفه من غدير
ان كان ما بل الوله والشوق ما يقطع ظماه
يا جارح ارحم لا تخليني وانا جرحي خطير
لا تستهين بخاطر المجروح وتزود عناه
حبك سكن قلبي ومع دمي بدا حبك يسير
يا كثر ما اغلي قلبك القاسي ولا حس بغلاه
يا مالك كل الحلا في مهجتي مالك خشير
لك منزل بين الضلوع العوج عال مستواه
مشتاق اشوفك مثل ما يشتاق للشوف الضرير
مشتاق لك واستغرب ان القلب يشتاق لشقاه
نسيان حبك ما دخل عقلي ولا يمكن يصير
لا ما نسى حبك هدب عيني ولا فكري نساه
واللي عذلني عنك يا خلي عسى عمره قصير
وشلون يعذل خافق الولهان عن غاية مناه