صلوا وصوموا

لا اله الا الله من قلب ولسان
افضل بداية خير وسم الجلاله
به نستعين ونلتجي كل الاحيان
المحيي المفني كفلنا كفاله
سبحانه المعبود علام ما كان
يعلم خفيات السراير لحاله
بامره تهب الريح وتهل الامزان
من مد لهمن بالمناشي خياله
تفرح به العربان وتعيش الاوطان
الله وكبر وش ندور بداله
ياربنا نحمدك صحه بالابدان
مع الأمن تطبيق حكم العداله
درع لنا عن كل ما كر وخوّان
ناس يختلون الاوادم ختاله
ابكمل الموضوع بسلوب فنان
واورد الافكار عد الاصاله
هذي نصيحة خير والقلب شفقان
ابختصر مانيب احب الاطاله
صلوا وصوموا واكملوا خمس الاركان
والمسلم العاقل يزكي حلاله
ترى التهاون بالمواجيب نقصان
من استطاع الحج يكرب حباله
ويحج فرضه والفريضه لها شان
والحج ما به فسق والا جهاله
بطهر بقاع الارض واقول يا خوان
الواجب اللي حج يفسح مجاله
لاخوانه اللي جوا من كل الاوطان
يدون فرض جا بنص الرساله
فرض على المسلم وللهرج برهان
كل يشد لبيت ربى رحاله
والخاتمه صلوا على نسل عدنان
عداد وبل الغيث شرق وشماله